وطنا الزين
كلمات محمد الحسن سالم حميد
الحان حمزة سليمان

وطنا حبيبنا رغم البين هي الأشواق
حنينا إليك زين يا زين يظل دفاق
وما حوجتنا ونديك
وغيمنا إليك دوم ساساق
يلاقي البينا من واديك
أناقي غزيرة ماها فراق
نحبك من طرف من جم
برغم قطائع الإملاق
ما بتنذم علاقة دم
وفاء وتاريخ علي الإطلاق
إذا ما الغربه لمتنا
علي ذات الخلق وأخلاق
وطن وين كان في ذمتنا
فكيف يبقي الزمن فراق ؟؟
هي الأشواق ...
وما بين السماء والأرض مد أشواق
ما طال المطر بتصب
طبيعي انو البحر ما راق
كما انو العكار من طين
كمان من طين يجي الرواق
صحيح انو المطر رايق
لكن السحاب قد ضاق
خبارو الريح بشن سايق
وقت كبد التراب مشتاق
إذا ما العشق منسابق
و مطًّابق على الأعماق
كذلك حضرة العشاق
مع غيبوبة الأشواق
وطنًّا الزين لا تنضرا لا تنعاق
نظل في حبلك الواحد
حبيبين مافي بينا فراق
وهيض شايلنا شيلة السّيبي
سعن الباشا و المعلاق
لا فينا الضلالي العاق
ويا حاسب سكاتنا رضاك
أمانة بطونا ماها غراق
صدورنا على البعادي زقاق
ضهورنا إلى المنادي رقاق
رضينا بلا قرن ننساق
وحين نحرن جبل يا ساق
الجرب يطير ما بمشي
لو حرّت عليه الأشواق
و من قولب لهيب الشمس
ما كوش من الرقراق..
وطنًّا الزين .. لا تنضرا لا تنعااااق